<div> Abiansemal (17/05/2018)</div> <div>  </div> <div> Kelapa utawi nyuh wantah silih sinunggil sarana upakara sane kabuatang pisan ritatkala ngawetenan yadnya. Makudang-kudang piranti upakara yadnya muatang kelapa pamekasnyane kelapa sane sampun kakelasan sane ketah mawasta kelapa daksina. Tios ring upakara kelapa kabuatang taler ring pawaregan pinaka sarana olahan ajengan, jangan tur sane tiosan. Nike mawinan kawentenannyane mabuat majeng ring kramane ring Bali.</div> <div>  </div> <div> Ketut Gatra maosang, indik kelapa ring Bali pamekasnyane ring desa Abiansemal sampun ngidikang santukan akeh pohon kelapa sane sampun lawas kaebah kaangge lakar utawi sampun nenten anut malih ring palemahan krama. Nika sane ngranang kelapa sukil pisan ngrereh utamannyane kelapa ageng<em>."Yening ngruruh kelapa daksina danganan malih akidik, santukan mangkin sampun akeh kramane myara pohon kelapa sane 'genjah'(unggul)," </em>tutur dane ritatkala KIM nyelehang utsaha dane ring wewidangan banjar Dirgahayu, desa Abiansemal rahina buda manis,(16/5). Dane taler maosang pariindikan utsahannyane boye je ngadol kelapa kemanten. Dane taler ngadol klangsah, rab ambengan tur sambuk kaanggen nguling.</div> <div>  </div> <div> Ring genah sane tiosan, perbekel Abiansemal, Ida Bagus Bisma Wiratma, S.H,<em> "Mangkin akeh krama Abiansemal sampun praside mautsaha ring makudang-kudang utsaha sane wenten. Silih sinunggil utsaha ngadol sarana upakara sekadi kelapa daksina wantah utsaha sane becik, tiyosang jagi ngruruh pangupa jiwa/maadolan taler nglestariang tur ngajegang budaya lan agama Hindune,"</em> baos perbekel.(001/KIM)</div>